وحشاني يا رنا

رنا وما ادراكم ما رنا

انا ورنا اتصاحبنا اوى اوى اوى في الفترة الاخيرة
يعني اخر كام شهر
وانا بعتز جدا بمعرفتي بالانسانة الرقيقة الجميلة الطيبة الحنينة
بتصعب عليا نفسي اوووووووووى لما بفتكرها
ومصدقتش انها ماتت ولحد دلوقتي مش قادرة اصدق
كنت بعيط لما بشوف كلام الاعضاء عنها بس بقعد اعيط
مبعرفش اكتب حاجة

كانت انسانة جميلة اوى وبتحب كل صحابها
وبتسال على كل الاعضاء
كانت دايما تقولي اساليلي على ديه وشوفيلي ديه
اكمنو كان صعب شوية من الموبايل انها تدخل وتتابع

مرة بتقولي عارفه نفسي بايه؟
قولتلها ايه
قالتلي اشوف المتواجدون الان في مجانين
قولتلها بس كده؟
رحت عملتلها كوبي لكل الصفحة
قالتلي لا انا عايزة اتابع واشوف على طول
قمت انا فكرت كده
وقولتلها خدي باصوردي بس اعمل متخفي وابقي ادخلي
قالتلي مش هيحصلك مشاكل لو انا دخلت؟
قولتلها لا طبعا هيحصل ايه بس
ودخلت كده معرفش كام مرة
بس رنا اتبسطت جدا
وقاللتي اتفرجت وشوفت صفحة الشكاوي والمقترحات كمان :)

كانت بتقول معرفش البت ميرال بتوحشنا كده ليه
ولما كنت اغيب كنت الاقيها قلقانة جدا عليا
وسايبالي اوفلاين كتير
كانت تقولي انا بدخل الصبح عشان ببقى عارفه انك موجودة
مرة قالتلي لما بشوف الفلسطينيين عالتلفزيون اقول مستحيل البت ميرال ديه تكون منهم

بس هيا لما تغيب انا كنت اخاف اوى ولما تظهر اقولها قلقت عليكي
تقولي اطمني لسه ممتش :(
كانت حاطة الموت قدام عنيها ومتخيلاه
تقولي ميرال انا كنت هموت الليلة
كل ليلة بقول مش هيطلع عليا صبح
بس بيطلع...
مرة بتقولي كنت هموت الليلة وماما دخلت عليا تطمن لقيتني مرمية عالارض ومغمى عليا
اقولها رنا لما تحسي بألم قولي لاهلك يجيبو دكتور
تقولي انا هفضل اشتكي؟
كانت نفسها عزيزة جدا ومش ترضى تشتكي كتير
مع انها بتتألم :(:(
مع انها عارفه انه اللي مبيهتمش بنفسه بيموت
لما غابت اخر مرة
انا قلقت جدا ومكنتش مرتاحة
اسال عليها يقولو اكيد ولدت
ونزلت توبيك وقالو انها ولدت
رنا اكتر حد بحزن عليه في حياتي كلها
هيا اللي كانت مجمعه عضوات المنتدى في كونفرنس دايما
يمكن من ساعة ما راحت رنا بقا الكونفرنس ده حالة نادرة بين الاعضاء

في مجلة مجانين كل اصداء بنعمل حوار مع عضو
ويوم كنت انا اللي هنزل المجلة
وبكلم رنا وبفكر مين العضو اللي هعمل معاه حوار
قولتلها رنا انتي
قالتلي انا؟ مقدرش
لاني من موبايل ومش هعرف ابعتلك الاجابات
قولتلها انا هسالك هنا في المحادثة وانتي تجاوبي هنا برده وانا اظبطهم
وفعلا حصل ده وكان من اجمل الحوارات بجد لانه مع اقرب انسانة لقلبي

المشاركة الأصلية كتبت بواسطة ميرال الحب حوار مع القلب عضوة رومانسية طيبة بتدخل عالقلب بسرعه مفيش حد ميحبهاش اخت وصديقة لكل العضوات طبعا معانا rana الاسم بالكامل : رنا عمر اللقب :rana تاريخ الميلاد : 28/9/1985 محل الاقامة : القاهرة بتعملي ايه اول ما تصحي من النوم : بدخل عالنت بتعملي ايه قبل ما تنامي :بقرأ شوية قرآن قدوتك فى الحياة بعد رسول الله والصحابة:بابا موقف اثر في حياتك:مرض ماما شيء بتتمنيه حالياً:بجد بجد رضا ربنا عنى السعادة من وجهة نظرك هى:رضا الله ممثلك /ممثلتك/مغنيك/مغنيتك المفضلين الممثلين كلهم عادي المغنى ممكن نقول محمد محيى المغنيه شرين أغلى شخص فى حياتك:جوزي لو لم اكون مصرية لوددت ان اكون..مصرية اكيد الوانك المفضله:الاسود و الاخضر و الابيض اكلتك المفضله:بيتزا سى فود شيخ تحب الاستماع لتسجيلاته:عبد الباسط عبد الصمد الداعيه المفضل :عمرو خالد الحب ولا المال؟ :انا والله بفضل الحب بس اكيد حب بدون مال هيكون صعب شيء ندمت عليه:ولا حاجة الحمدلله حكمتك بالحياة:عامل الناس كما تحب ان يعاملوك فيلم بتحبيه اوى:حبيبي دائماً كلمة بتحبي تسمعيها اوى:بحبك وظيفة تمنيتي تشتغليها في حياتك :مهندسة كلمة نفسك تمحيها من الكلمات:خيانة المنتدى في حياتك : شيء مهم أكتر خمسة أعضاء من وجهة نظرك يساهمون الآن فى تطوير المنتدى؟ بوسى كات توتا برتينى ميرال الحب روراز و المهاجر أفضل مسلسل ل2009 :الرحايا اخر نكتة سمعتيها مره طالبه مشاغبه المدرس اشتكاها للمدير المدير بعتلها قال لها "عملتى ايه؟" قالت له "ولا حاحه رميت ورده من الشباك" قال "بس كده؟" قالتله "اه" بعد شويه لقى طالبه مدغدغه ومكسره سالها "ايه الى عمل فيكى كده؟" قالت له "انا ورده الى اترميت من الشباك." كلمة أخيرة لمجانين واعضاء مجانين؟؟ انا بحبكم جدا بس نفسى اشوفكم احسن من كدا

كنت بكلمها كتيييييييييير
تقريبا شبه يومي
واحيانا باليوم اكتر من مرة
كنا صحاب اوى منقدرش نستغني عن بعض
لما بجيب سيرة حد من الاعضاء تقولي لالالا مش بحب كده ده هيعتبر نميمة ويبقى حرام
اقولها لالالا ده مكتوب في المنتدى اصلا واعتبري نفسك شفتيه هناك :d
تقولي يعني مش حرام؟ طب ماشي ههه

اقولها هتجيبي بنت ولا ولد يا رنا
تقولي لا مش عايزة اعرف دلوقتي
هخليها مفاجأة
بس طارت المفاجأة للاسف !!

وكانت تحب جوزها عمرو جداااااا
ومتكلمش اي راجل تاني خالص ولا من اعضاء المنتدى ولا حتى شات عالميل
وتقولي انا ست متجوزة وبحب جوزي وبحترمه

كانت تضايق جدا لما تسمع عن الخيانة
ولما تعرف انه حد خان حد او واحد ساب مراته او اتجوز عليها
كان يبقى يوم اسود ومنيل عندها
او تعرف انه في راجل متجوز بيكلم بنات وانتيم وكده

كانت رقيقة جدا وتخاف على مشاعر الاعضاء وتحب تسال عليهم وتطمن عليهم دايما
هقول ايه بس عنك يا رنا!
سبتينا ومشيتي كده
انتي ملاك
ويمكن الملاك ده فعلا مكانه فوق في الجنه
مينفعش يفضل مع البني ادمين العاديين
ربنا يرحمك برحمته
ويغفرلك
الفـــــــاتـــــحــــــة

سورة الفاتحة (1)
بِسْمِ اللّهِ الرَّحْمَنِ الرَّحِيمِ ﴿1/1﴾

الْحَمْدُ للّهِ رَبِّ الْعَالَمِينَ ﴿1/2﴾ الرَّحْمنِ الرَّحِيمِ ﴿1/3﴾ مَلِكِ يَوْمِ الدِّينِ ﴿1/4﴾ إِيَّاكَ نَعْبُدُ وإِيَّاكَ نَسْتَعِينُ ﴿1/5﴾ اهدِنَا الصِّرَاطَ المُستَقِيمَ ﴿1/6﴾ صِرَاطَ الَّذِينَ أَنعَمتَ عَلَيهِمْ غَيرِ المَغضُوبِ عَلَيهِمْ وَلاَ الضَّالِّينَ ﴿1/7﴾